Tadhg Mac Dhonnagáin

Is as Achadh Mór i gContae Mhaigh Eo do Thadhg ó dhúchas agus tá sé ag cur faoi i gCois Fharraige ón mbliain 2000 i leith. Tá amhráin cumtha aige agus albaim taifeadta aige do dhaoine fásta (Raiftearaí san Underground) agus do pháistí (Bliain na nAmhrán) agus tá cóiriú agus taifeadadh déanta aige, i gcomhar lena leathbhádóir ceoil, John Ryan, ar ábhar ón traidisiún béil, idir rannta, amhráin, orthaí agus eile (Gugalaí Gug!, Peigín Leitir Móir, Aniar). Tá aithne air mar chruthaitheoir agus scríbhneoir don scáileán (an tsraith theilifíse Aifric), mar scríbhneoir beathaisnéise (Mise Raiftearaí an Fíodóir Focal) agus mar úrscéalaí (Madame Lazare). Tá duaiseanna éagsúla bainte aige dá chuid scríbhneoireachta, ina measc Gradam Réics Carló, Gradam Children’s Books Ireland, Gradam White Raven ó Leabharlann Idirnáisiúnta na nÓg, Munich, Gradam Uí Shúilleabháin, Gradam An Post do Leabhar Éireannach na Bliana agus Aitheantas Speisialta ó Dhuais Litríochta an Aontais Eorpaigh. Tá fáil ar a shaothar i gcuid mhaith teangacha ar fud na cruinne.